325Profesionistë të tjerë të shëndetësisë

Përshkrimi

Profesionistët e tjerë të shëndetësisë kryejnë një sërë detyrash dhe ofrojnë shërbimin e tyre mbështetës në stomatologji, administrimin e të dhënave mjekësore, në shëndetin publik, në shëndetin mjedisor, fizioterapi, në rregullimin dhe parandalimin e çrregullimeve të shikimit, në trajtime mjekësore urgjente, si edhe në shumë aktivitete të tjera që kanë për qëllim përmirësimin e shëndetit të njerëzve. Ata mund të punësohen në institucione të kujdesit shëndetësor, si spitale, klinika dentare, konsultore, ambulanca, institute inspektimi, etj.

Detyrat kryesore

• Ofrojnë shërbime bazë për parandalimin dhe trajtimin e sëmundjeve dhe çrregullimeve të dhëmbëve dhe gojës;
• Këshillojnë individët dhe komunitetin për higjienën, dietën ushqimore dhe masa të tjera parandaluese për uljen e rreziqeve të shëndetit;
• Plotësojnë dhe mirëmbajnë të dhënat e pacientëve (kartelat mjekësore, protokolle, etj.) për të dokumentuar kushtet shëndetësore dhe trajtimet e pacientëve, por edhe për kërkime të ndryshme mjekësore, kontroll kostosh dhe përmirësim shërbimi;
• Ndihmojnë familjet për të zhvilluar aftësitë dhe burimet e nevojshme për të përmirësuar gjendjen e tyre shëndetësore;
• Këshillojnë komunitetin, subjektet tregtare, etj. për higjienën dhe shëndetin publik me qëllim kufizimin e përhapjes së infeksioneve dhe sëmundjeve të ndryshme;
• Përgatisin dhe shpërndajnë tek pacienti lente optike;
• Inspektojnë zbatimin e rregullave dhe ligjeve për mjedisin dhe faktorët e tjerë profesionalë që kanë ndikim potencial në shëndetin publik;
• Masazhojnë indet e buta të trupit;
• Shoqërojnë pacientët në dhomat e ekzaminimit dhe i përgatisin ata për ekzaminimin;
• Presin dhe kurojnë raste aksidentesh dhe urgjenca që kanë nevojë për ndihmë mjekësore;
• Zbatojnë kodin e etikës së institucionit ku punojnë;
• Zbatojnë rregullat e sigurimit dhe mbrojtjes së shëndetit;
• Zbatojnë rregullat e sigurimit dhe të mbrojtjes së mjedisit.

Kërkesat

• Kushti kryesor për të hyrë në këtë profesion është diploma Bachelor por në ndonjë rast të veçantë mund të jetë e pranueshme edhe diploma e shkollave pas të mesme profesionale;
• Të jetë i përgjegjshëm dhe i komunikueshëm.