9312Punëtorë në ndërtim dhe mirëmbajtje të rrugëve digave dhe të ngjashme

Përshkrimi

Punëtorët në ndërtim dhe mirëmbajtje të rrugëve digave dhe të ngjashme kryejnë punë të përditshme në sektorin e ndërtimeve të objekteve, në mirëmbajtjen e rrugëve, hekurudhave, digave, në hapjen kanaleve dhe punimeve të tjera të infrastrukturës civile urbane.

Detyrat kryesore

• Gërmojnë dhe mbushin gropa dhe kanale duke përdorur mjete pune dore;
• Heqin dhe përhapin rërë, zhavorr, çimento dhe materiale të tjera të ngjashme duke përdorur lopatën si mjet pune dore;
• Copëtojnë dhe presin gurë, shtresa betoni dhe shtresa bitumi duke përdorur çekiçë dore apo pneumatikë;
• Ngarkojnë dhe shkarkojnë materiale dhe pajisje ndërtimi si dhe materiale të gërmuara;
• Transportojnë materiale dhe pajisje nëpër vendet e ndërtimit duke përdorur karroca dore dhe pajisje transportuese që drejtohen e manovrohen me dorë;
• Pastrojnë vendin ku punohet dhe rreth e qark tij dhe zhvendosin pengesa të mundshme;
• Pastrojnë tulla të përdorura në ndërtim dhe bëjnë punë të tjera të thjeshta në vendet ku shemben e prishen ndërtesa;
• Përziejnë materiale që derdhen dhe përhapen të tilla si betoni, suvaja dhe llaçi;
• Pastrojnë dhe riparojnë sistemet e kullimit të ujit, urat, tunelet dhe strukturat e tjera;
• Përhapin dhe shtrojnë pjesë riparuese, për të riparuar pjesë të trotuareve të thyer;
• Transportojnë dhe përhapin rërë dhe zhavorr për të mbushur pjesët të dëmtuara nga erozioni dhe riparojnë anët e rrugëve;
• Kryejnë punime të peizazhit në anë të rrugëve, duke pastruar barërat e këqija, duke krasitur dhe mbledhur pemë;
• Kryejnë punë të tjera të ngjashme si këto;
• Zbatojnë rregullat në mbrojtje të mjedisit dhe shëndetit të njerëzve;
• Zbatojnë rregullat e sigurimit teknik gjatë punës.

Kërkesat

• Të ketë mbaruar arsimin e detyrueshëm shkollor.
• Të ketë aftësitë praktike për të punuar në terren të hapur.
• Të jetë e/i vetëdijshëm për problemet e sigurisë së shëndetit.
• Të dijë të përcaktojë se cilat vegla duhen përdorur për cilën proces pune.
• Të jetë e/i aftë për të kryer punë që kërkojnë forcë fizike të madhe.
• Të jetë e/i vetë-disiplinuar në proceset e punës.
• Të punojë mirë edhe në raste të mungesës së mbikëqyrjes.
• Të jetë e/i përkushtuar të ruajë higjienën e përshtatshme në vendin e punës.

Informacion shtesë

• Kualifikimi mund të kryhet me fillimin dhe në vazhdimësi të punës.
• Mund të merret instruktim për aspekte të sigurisë në punë dhe rregullat e punës.
• Kërkohet të mësoni njohuritë bazë mbi ndihmën e shpejtë.
• Kryerja me përkushtim e cilësi e punës mund të japë pozicionin e përgjegjësit të grupit.