522Shitës në dyqane

Përshkrimi

Shitësi në dyqane merren me tregtimin e mallrave apo shërbimeve në njësit e shitjes me shumicë dhe pakicë duke dhënë informacione apo duke shpjeguar funksionet dhe cilësitë e këtyre mallrave, kontrollojnë dhe Mbikëqyrin aktivitetin e shitjes dhe të sigurimit të cilësisë në njësinë e vet të shërbimit, të tilla si supermarkete, dyqane, magazina me pakicë dhe shumicë etj. Ata përgatitin faturat dhe kryejnë marrjen e pagesave për mallrat ose shërbimet e kryera. Ata mund të punësohen në kompani shërbimesh shitjeje, ekspozimi apo marketingu të produkteve të ndryshme, në supermarkete, në panaire e ekspozita të ndryshme, etj. apo të vetëpunësohen.

Detyrat kryesore

• Planifikojnë dhe përgatitin oraret e punës duke përcaktuar dhe komunikuar detyrat e personelit në njësinë e vet të shërbimit;
• Udhëzojnë dhe trajnojnë personelin mbi procedurat e shitjes së produktit apo shërbimit në njësinë e vet;
• Sigurojnë që konsumatorët të marrin shërbim të shpejtë dhe cilësor duke kontrolluar zbatimin e procedurave të sigurimit të cilësisë;
• Presin klientët në njësinë e vetë të shërbimit dhe e orientojnë ata për në repartin e duhur;
• Informojnë klientët lidhur me gamën e produkteve të ofruara dhe demonstrojnë apo shpjegojnë përdorimin dhe funksionimin e produktit për shitje;
• Këshillojnë klientët për përdorimin dhe kujdesin lidhur me produktin përkatës;
• Informojnë klientët lidhur me çmimet e produktit dhe mënyrat e mundshme të pagesës;
• Shesin mallra, produkte duke pranuar një shumëllojshmëri metodash pagese;
• Kryejnë regjistrimin e shitjeve në regjistra përkatës ose kompjuter;
• Hartojnë kërkesën për furnizime në raste mungesash të produktit në njësinë e vet të shërbimit;
• Stivojnë dhe reklamojnë mallra për shitje si dhe paketojnë mallrat e shitur;
• Japin informacione shtesë lidhur me shërbimet e ndryshme që kryhen në njësinë e tyre kur është e nevojshme;
• Kontrollojnë hartimin e faturave, llogarive apo marrjen e pagesës përkatëse;
• Bëjnë bilance ditore, mujore, vjetore të punës së kryer në njësinë e vet të shërbimit;
• Kryejnë detyra të tjera të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një shkolle profesionale në këtë fushë (ekonomike).
• Të ketë kryer një kurs formimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës shitës. Me fitimin e eksperiencës dhe me kualifikim shtesë mund të kalojë në nivelin shitës i kualifikuar. Më pas nëpërmjet kualifikimit të mëtejshëm në shkollat profesionale apo trajnimit nëpërmjet punës, një shitës dyqanesh mund të ndërmarrë disa funksione mbikëqyrëse duke ngjitur shkallët e karrierës si manaxher në një njësi shërbimi. Ndjekja e shkollës së lartë, çon në diplomimin e specialistëve të këtij profesioni në nivelin ekonomist, financier, etj.

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.