7522Prodhues i mobilieve dhe të tjerë të ngjashëm

Përshkrimi

Prodhuesi i mobilieve dhe të tjerë të ngjashëm bën përpunimin e drurit për prodhime gjysmë të gatshme, si dhe përpunimin e elementëve gjysmë të gatshme (melaminës, kompensatës, MDF, fibrës, etj.) në elementë për prodhimin e dyerve, mobilieve të ndryshme, prodhimeve artistike, riparimeve, prodhimin e varkave prej druri, tapiceri etj. Prodhuesi i mobilieve mund të punësohet në ndërmarrje të ndryshme si prodhues ose në mirëmbajtje, reparte dhe mini-reparte të ndryshme prodhimi mobiliesh, të vetëpunësohet etj.

Detyrat kryesore

• Komunikojnë me klientët për të realizuar kërkesat e tyre;
• Konsultohen me kolegët për porositë e marra nga klientët, si dhe për mbarëvajtjen e punës;
• Kryejnë matjet e nevojshme, duke përdorur instrumentet përkatës;
• Bëjnë skicime të ndryshme;
• Bëjnë preventiv për punimet e ndryshme që realizohen në njësinë e biznesit;
• Parapërgatitin vendin e punës (kontrollojnë makineritë, pastrojnë vendin e punës etj.);
• Përpunojnë detalet prej druri me M.D.F. dhe me melamin;
• Përpunojnë tabelën e prerjes;
• Bëjnë shënimin dhe prerjen e materialit me mbishtesa;
• Kalojnë detalin në plan groset dhe bëjnë shkurtimin në përmasa neto;
• Kryejnë punime për frezim, sipas tabelës së prerjes;
• Kryejnë punime për birim, tabelës së prerjes;
• Kryejnë punime për zbusim, sipas tabelës së prerjes;
• Kryejnë punime për montimin në të thatë dhe me lëndë ngjitëse;
• Bëjnë lustrimin e produktit dhe montimin e aksesorëve;
• Kryejnë montimin e aksesorëve;
• Kryejnë punime smerilimi;
• Kryejnë kontrollin përfundimtar të produktit, duke përdorur vegla dore dhe pajisje të nevojshme për matje;
• Bëjnë paketimin e produktit;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimiprofesional në këtë fushë;
• Të jetë e/i aftë fizikisht dhe mendërisht.

Informacion shtesë

• Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një prodhues i mobilieve mund të ndërmarrë disa funksione mbikëqyrëse duke ngritur shkallët e karrierës në nivel tekniku. Ndjekja e shkollës së lartë, çon në diplomimin e specialistëve të këtij profesioni në nivelin inxhinier druri, dega përpunim druri.
• Për të zhvilluar aktivitet privat (vetëpunësim) ne fushën e përpunimit të drurit duhet regjistrimi për ushtrim aktiviteti si person fizik apo juridik, sipas rastit.
• Punonjësit në këtë profesion mund të specializohen në fushat e mëposhtme, të tilla si: makinist për përpunimin e drurit, montues mobiliesh, prodhues i lëndës së sharruar, projektues për prodhimin e mobilieve, karpentier, mirëmbajtës të prodhimeve prej druri etj.