7516Përpunues të frutave dhe perimeve

Përshkrimi

Përpunuesi i frutave dhe perimeve merret me përgatitjen, përpunimin ose konservimin e frutave, perimeve dhe ushqimeve të ngjashme në mënyra të ndryshme, përfshirë zierjen, tharjen, kriposjen ose ekstraktimin e lëngjeve ose vajit, për tregti dhe konsum. Ai përgatit nënprodukte të perimeve, të frutave, prodhon pije alkoolike dhe jo-alkoolike etj. Ai merret me përpunimin, ambalazhimin dhe ruajtjen dhe tregtimin e tyre. Ai mund të punësohet në kompani të ndryshme shërbimesh, prodhimesh ushqimore, në shoqëri tregtare që kanë reparte të shërbimit ushqimor dhe të vetëpunësohet.

Detyrat kryesore

• Bëjnë preventivin e materialeve të duhura për prodhimin, përgatitjen e nënprodukteve në sasinë e kërkuar;
• Sigurojnë lëndën e parë të nevojshme për prodhimin e produktit;
• Përgatitin makineritë apo pajisjet për punë;
• Kryejnë peshime apo matje të sasisë së lëndës së parë që do të përdorin për prodhimin, përgatitjen e nënprodukteve;
• Bëjnë seleksionimin e frutave dhe perimeve sipas cilësisë së kërkuar për nënproduktin që do të prodhojnë;
• Bëjnë larjen e sasisë më makineri ose jo;
• Kryejnë prerjen ose heqjen e bërthamave, kur ka të tilla;
• Kryejnë zierje, sheqerosje ose kriposje sipas kushteve teknike të kërkuara për çdo nënprodukt;
• Përpunojnë fruta, perime dhe përgatitin nënprodukte ushqimore prej tyre;
• Përpunojnë fruta për përgatitjen e pijeve jo-alkoolike (lëngje frutash);
• Shtojnë përbërësit e nevojshëm për prodhimin e tyre;
• Përpunojnë frutat dhe perimet për përgatitjen e koncentrateve të tyre, salcave të ndryshme etj.;
• Përpunojnë fruta për përgatitjen e reçelit dhe marmaladës;
• Kryejnë përpunimin e ullirit për prodhimin e vajit;
• Kryejnë konservimin e frutave, perimeve, me metodat apo teknologjitë përkatëse (zierje, kriposje, tharja etj.);
• Vendosin ushqimet e konservuara në kavanoza steril, shishe ose enë të tjera;
• Bëjnë ambalazhimet e nevojshme të nënprodukteve të prodhuara;
• Ruajnë produktet dhe lëndën e parë në kushtet teknike dhe frigoriferike të duhura;
• Kryejnë tregtimin e produkteve dhe nënprodukteve ushqimore;
• Pastrojnë makineritë dhe pajisjet e përdorura;
• Realizojnë detyra të tjera të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional në këtë fushë;
• Të jetë e/i aftë fizikisht dhe mendërisht.

Informacion shtesë

• Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një përpunues i frutave dhe perimeve mund të ndërmarrë disa funksione mbikëqyrëse. Ndjekja e shkollës së lartë, çon në diplomimin e specialistëve të këtij profesioni në nivelin inxhinier kimist.
• Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.
• Punonjësit në këtë grup profesionesh mund të specializohen në fushat e mëposhtme, të tilla si; konservues frutash, prodhues lëng frutash, prodhues reçeli dhe marmaladë, prodhues të frutave të sheqerosura, prodhues të turshive, prodhues të vajrave ushqimorë etj.