7513Bërës produktesh brumi

Përshkrimi

Bërësi i produkteve të brumit merret me përgatitjen e brumit për baza pice, byrek, makarona petë, biskota, amareta, apo produkte të tjera brumi, si dhe me pjekjen, ambalazhimin dhe ruajtjen e tyre. Ai siguron bazën e nevojshme materiale dhe përgatit makineritë apo pajisjet për punë duke zbatuar rregullat e ruajtjes dhe sigurisë ushqimore. Ai mund të punësohet në kompani të ndryshme shërbimi ushqimore, në shoqëri tregtare që kanë reparte të shërbimit ushqimor, apo edhe të vetëpunësohet.

Detyrat kryesore

• Marrin porosinë nga klientët;
• Bëjnë preventivin e materialeve të duhura për prodhimin e brumit të produktit të kërkuar;
• Sigurojnë bazën e nevojshme materiale;
• Përgatitin makineritë apo pajisjet për punë;
• Kryejnë peshime apo matje të sasisë së lëndës së parë që do të përdorin për prodhimin e brumit të nevojshëm;
• Hedhin sasitë e duhura të miellit, vezëve, sheqerit, kripës, gjalpit, ujit, majasë apo përbërësve të tjerë,(sipas llojit të produktit që do të prodhojë) në brumatriçe apo enën e duhur për t’u përzier;
• Bëjnë përzierjen e masës me dorë apo brumatriçe deri sa të bëhet lidhja e materialeve (bëhet brumi);
• Nxjerrin brumin nga brumatriçja apo ena ku është bërë përzierja;
• Ndajnë brumin me masa të barabarta;
• Bëjnë hapjen brumit në petë me dorë ose me makineri;
• Shtojnë gjalpin mbi petë duke bërë 3-4 palosje deri sa të lidhen me njëra- tjetrën;
• Presin brumin në format e duhura;
• Bëjnë mbushjen e tyre sipas porosisë dhe produktit të kërkuar;
• Vendosin produktet në dhomën e ardhjes, duke respektuar afatet e duhura;
• Bëjnë pjekjen e produktit në temperaturën dhe kohën e duhur;
• Pastrojnë makineritë dhe pajisjet e përdorura;
• Ruajnë produktet dhe bazën materiale në kushtet e duhura;
• Bëjnë ambalazhimet e nevojshme;
• Realizojnë detyra të tjera të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional në këtë fushë;
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një bërës produktesh brumi mund të ndërmarrë disa funksione mbikëqyrëse. Ndjekja e shkollës së lartë, çon në diplomimin e specialistëve të këtij profesioni në nivelin inxhinier të kimisë ushqimore, teknolog ushqimor.

Për të zhvilluar aktivitet privat (vetëpunësim) në këtë fushë bërësit e produkteve të brumit i duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme, të tilla si bërës bazash pice, bërës byreku, bërës makaronash, biskotash, amaretash etj.