7316Punues qelqi

Përshkrimi

Punuesi i qelqit krijon sende zbukuruese të punuara me qelq të shkrirë. Punuesi i qelqit fryn, jep formë, preson, pret, pastron dhe punon qelqin e shkrirë sipas modeleve përkatëse për të prodhuar sende zbukuruese për dhurata, enë qelqi për tavolina, zbukurime artizanale për ekspozita etj. Mjeti kryesor i përpunuesit të qelqit është një tub i gjatë metalik që përgjithësisht quhet tubi fryrës. Punuesi i qelqit mbikëqyr furrat dhe pajisjet që përdoren për të prodhuar sendet prej qelqi.

Detyrat kryesore

• Rregullojnë temperaturën në nivel nxehtësie të përshtatshme të furrës në bazë të llojit të qelqit që do të punohet;
• Kombinojnë përbërësit në një enë të madhe të posaçme për të krijuar brumin përkatës të qelqit;
• Rritin temperaturën e qelqit në nivelin e kërkuar dhe e rrotullojnë atë për ta ngrohur në mënyrë uniforme duke përdorur flakët e gazit apo nxehtësinë që vjen nga furrat;
• Përziejnë dhe rrotullojnë tubin fryrës që të krijojnë një formë prej qelqi të shkrirë të mbledhur në fund të tubit;
• Fryjnë ajër brenda tubit deri në fund të tij ku gjendet masa me qelq të shkrirë për të formuar enë laboratorike, faqore, enë distilimi, pikatore etj.;
• Përdorin shpatull të sheshtë prej plumbi dhe pince kalibër për të presuar, tërhequr, ngjeshur dhe rrotulluar qelqin e shkrirë, sipas situatës;
• Përdorin kallëpe gjatë procesit të fryrjes për të realizuar punimin e duhur në formën që kërkohet;
• Kujdesen për formën e krijuar që ajo të ftohet në mënyrë graduale për të parandaluar qelqin që të mos thyhet;
• Smerilojnë apo pastrojnë sendet prej qelqi apo pjesë të tyre, për të korrigjuar defektet;
• Përgatitin sipërfaqet e enëve të formuara, për të bërë pastrim të mëtejshëm duke zbutur faqet e ashpra anësore me smerilues apo me pajisje me rrotë me dhëmbëza;
• Përdorin prerës artizanale (elmaz) për t’i dhënë materialit formën sipas kërkesës;
• Ndjekin radhën e punës duke mbajtur parasysh përmasat, vendin e prerjes dhe sasinë që do të pritet;
• Kontrollojnë stokun e qelqit dhe objektet e përfunduara , duke nxjerrë mënjanë ato sende që janë me defekte;
• Montojnë, vendosin në punë dhe rregullojnë pajisjet kompjuterike të prerjes së xhamit;
• Inspektojnë, peshojnë dhe matin produktet për të verifikuar përputhshmërinë me specifikimet e kërkuara, duke përdorur instrumente të tilla si mikrometrat, kalibrat, lupat dhe vizoret;
• Spërkatin me solucion argjendi në xham për të prodhuar pasqyra.

Kërkesat

• Përfundimi i arsimit profesional në këtë fushë është i domosdoshëm;
• Të jetë shumë i mprehtë;
• Të ketë aftësi të mira krijuese në përpunimin e qelqit;
• Të ketë shije dhe vlerësim artistik për punimet që kryen;
• Të ketë saktësi dhe preçizion në dhënien e formave;
• Të ketë durim dhe aftësi përqendrimi të lartë.

Informacion shtesë

Kërkesat për këtë profesion fokusohen më shumë tek aftësitë personale për të kryer punën;

Aftësitë mund të zhvillohen duke punuar si ndihmës pranë një mjeshtri përpunues i qelqit;

Zakonisht fillohet puna pranë një mjeshtri, por në se individi është i vetëpunësuar, mund të punojë në një punishte të vogël të vetën.

Punësimi mund të jetë edhe në dyqane të vogla ku shiten punimet e qelqit me artikuj të tjerë artizanalë;

Pjesëmarrja në panaire jep vlerë të shtuar në fushën e marketingut.

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.