7133Punëtorë të pastrimit të konstruksioneve të ndërtesave

Përshkrimi

Punëtori i pastrimit të konstruksioneve të ndërtesave kryen procese të ndryshme pune si: zmerilim, pastrim, larje, lyerje të fasadës etj. të ndërtesave, të strukturave të ndryshme të shtëpive, apartamentet, fabrikat dhe të tjera të ngjashme. Ai përdor mjetet dhe materialet e ndryshme të pastrimit sipas proceseve të punës. Ai mund të punësohet në kompani të shërbimeve të pastrimi apo të vetëpunësohet.

Detyrat kryesore

• Kryejnë punime përgatitore për mbërthimin e konstruksioneve mbajtëse që do të përdorin gjatë procesit të pastrimit;
• Montojnë skela apo shkallë të përkohshme prej metali ose druri në vendet e punës;
• Bëjnë matjet në objekt për të përcaktuar sasinë e bojës apo të solucioneve të ndryshme (në rastin e fasadave prej xhami) dhe materialeve të tjera ndihmëse;
• Përcaktojnë ndërhyrjet që do të kryejnë në sipërfaqet e dëmtuara;
• Përgatitin mjetet dhe pajisjet e punës për pastrim sipas punës që do të kryejnë;
• Bëjnë stukimin e plasaritjeve të sipërfaqeve si dhe zmerilimin e tyre, lëmimin e sipërfaqes dhe heqjen e pluhurave;
• Pastrojnë ndërtesat nga myku apo mbeturinat në sipërfaqet e dëmtuar nga zjarri;
• Kryejnë lyerjen e sipërfaqeve me bojëra kundër ndryshkut dhe korrozionit;
• Përzgjedhin dhe përgatitin solucionet e pastrimit sipas dozave të duhura;
• Pastrojnë sipërfaqe të jashtme prej guri, tulla, metali apo materiale të ngjashme me mjete të ndryshme pastrimi (me letër zmerile, furçe teli etj.) dhe kimikatet e duhura, për pastrim;
• Përdorin avull nën presion të lartë apo rërë për pastrim, sipas procedurave teknike të paracaktuara;
• Bëjnë spërkatjen me solucion për heqjen e yndyrave dhe mbetjeve vajore në xham;
• Bëjnë heqjen e papastërtive me gominë pastruese;
• Bëjnë spërkatjen me solucione të ndryshme dhe pastrimin e sipërfaqes së mermertë;
• Bëjnë shpëlarjen e sipërfaqes me pompë uji me presion;
• Bëjnë punime pastrimi në oxhaqe dhe tubacionet që lidhen me to, si dhe heqjen e blozës dhe papastërtive të rëna në fundin e oxhakut;
• Pastrojnë dhe mirëmbajnë veglat dhe pajisjet e punës;
• Realizojnë detyra të tjera të ngjashme;
• Mbikëqyrin punëtorët e tjerë.
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një punëtor i pastrimit të konstruksioneve të ndërtesave mund të ndërmarrë disa funksione mbikëqyrëse duke ngritur shkallët e karrierës në nivel tekniku. Ndjekja e shkollës së lartë, çon në diplomimin e specialistëve të këtij profesioni në nivelin e inxhinierit.

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme, të tilla si: fshirës oxhaku, pastrues për pjesët e jashtme të ndërtesave, pastrues për pjesët e jashtme të ndërtesave me xhama etj.