7127Instalues dhe riparues të kondicionerëve dhe sistemeve ftohëse-ngrohëse

Përshkrimi

Instaluesi dhe riparuesi i kondicionerëve dhe sistemeve ftohëse-ngrohëse merret me parapërgatitjen, montimin dhe instalimin e kondicionerëve, kaldajave, paneleve diellore, çillërave (sistemeve ngrohëse-ftohëse), si dhe kryen riparime apo punime mirëmbajtjeje në sistemet e ngrohje-ftohjes. Ai mund të punësohet në kompani të shërbimeve të ndërtimit apo të vetëpunësohet.

Detyrat kryesore

• Marrin porosinë nga klienti;
• Bëjnë preventivin sipas porosisë së dhënë nga klienti;
• Konsultohen me kolegët për punimet që do të kryhen;
• Interpretojnë projektet, vizatimet apo specifikimet e tjera;
• Kontrollojnë vendin ku do të kryejnë montimin e pajisjet ftohëse-ngrohëse për të kryer modifikimet e duhura;
• Parapërgatitin bazën materiale dhe mjetet e punës që do t’iu duhen për të kryer punimet;
• Bëjnë shtrirjen e tubave të bakrit në dysheme dhe mure (në rastin e kaldajës, çillerit, apo paneleve diellore) sipas projektimeve përkatëse;
• Montojnë tubat e bakrit në pajisjen e brendshme (kondicionerit, kaldajës, çillerit).
• Montojnë pajisjen mbajtëse të brendshme;
• Bëjnë lidhjen e kabullit në pajisjen e brendshme (kondicionerit, kaldajës, çillerit).
• Bëjnë montimin e pajisjes së brendshme;
• Bëjnë montimin e bazave të motorit apo të panelit diellor;
• Montojnë motorin e kondicionerit, kaldajën apo panelin diellor;
• Bëjnë lidhjen e tubave dhe kabllove në pajisje, sipas llojit dhe dimensioneve të tyre;
• Përgatitin formën konike të kokave të tubave të bakrit;
• Montojnë komponentët e pajisjeve ngrohëse-ftohëse në një sistem;
• Kryejnë instalimet e duhura;
• Diagnostikojnë sistemin për gabime të mundshme dhe bëjnë korrigjimet e duhura;
• Bëjnë kontrollin për gaz apo ujë, sipas llojit të pajisjes;
• Bëjnë matjen e presionit me manometër;
• Bëjnë plotësimin e diferencave të humbjes;
• Bëjnë hapjen e gazit tek kondicioneri sipas trashësisë së tubave;
• Kryejnë hapjen e ujit tek kaldaja apo paneli diellor;
• Bëjnë vendosjen e pajisjeve në punë dhe kontrollin përfundimtar të tyre;
• Kryejnë provën e mirëfunksionimit të pajisjes ngrohëse-ftohëse dhe sistemit të instaluar;
• Kryejnë riparime të komponentëve të tillë si: kompresorë, motor, kondensator, si dhe riparime të tjera në sistemin e instaluar për ngrohje-ftohje;
• Kryejnë pastrimin periodik të pajisjeve;
• Realizojnë detyra të tjera të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një instalues dhe riparues i kondicionerëve dhe sistemeve ftohëse-ngrohëse mund të ndërmarrë disa funksione mbikëqyrëse duke ngritur shkallët e karrierës në nivel tekniku. Ndjekja e shkollës së lartë, çon në diplomimin e specialistëve të këtij profesioni në nivelin e inxhinierit.

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme, të tilla si: instalues të kaldajave, instalues të kondicionerëve dhe sistemeve ftohëse - ngrohëse, instalues të paneleve diellore, riparues, mirëmbajtës të kaldajave etj.