7121Ndërtues të çative

Përshkrimi

Ndërtuesi i çative mbulon, mirëmban dhe riparon skeletin e çative dhe mbulesën e tyre me materiale të llojeve të ndryshme si: pllaka guri ose të parafabrikuara, tjegulla, material sintetik, serë, mbështjellëse metalike apo materiale të tjera natyrore tradicionale, në të gjitha llojet e ndërtesave. Ai mund të punësohen në kompani të ndryshme ndërtimi, mirëmbajtjeje ndërtimesh dhe të vetëpunësohen.

Detyrat kryesore

• Njihen me objektin;
• Studiojnë projektin dhe specifikimet përkatëse të kantierit të ndërtimit, për të përcaktuar materialet e kërkuara;
• Konsultohen me kolegët për porositë e marra nga klientët, si dhe për mbarëvajtjen e punës;
• Bëjnë përllogaritje të thjeshta të kostos;
• Përzgjedhin bazën materiale sipas projektit;
• Bëjnë ndarjen e detyrave;
• Përzgjedhin veglat dhe pajisjet e punës;
• Përcaktojnë radhën e punës;
• Prishin çatinë ekzistuese në rast riparimi;
• Kryejnë matje dhe prerje të materialeve të ndryshme për mbulim;
• Montojnë skelën dhe bëjnë përforcimin e saj;
• Shtrojnë brezat e drurit mbi mure (dograma);
• Shtrojnë trarët e tavanit (zinxhirët);
• Shtrojnë zinxhirët për të ngritur baballëkët;
• Montojnë baballëkët mbi zinxhirë;
• Montojnë trarin (zinxhirin) e kulmit;
• Montojnë trarët e çatisë;
• Vendosin zinxhirët e dajakosjeve;
• Kryejnë dajakosjen e çatisë me rasë guri (përforcim);
• Montojnë bishtat e spretheve (të çatisë);
• Vendosin traversën mbi bishtat (pjesët fundore të çatisë);
• Montojnë petavrimin e çatisë;
• Shtrojnë kartoserën (kur është e nevojshme);
• Kryejnë shtrimin e rrasës së gurit;
• Vendosin kulmet nga poshtë lartë;
• Shtrojnë ristelat e holla mbi trarët e çatisë për çati me tjegulla;
• Shtrojnë ristela të trasha për të vendosur tjegullat;
• Vendosin ferizol apo materiale të tjera për izolim;
• Fiksojnë tjegullat me tel apo me gozhdë;
• Vendosin kulmet e çatisë me tjegulla nga poshtë lartë me llac;
• Vendosin ulluqet;
• Shtrojnë llamarinën në ulluqet e çatisë;
• Bëjnë punime plotësuese për mbulim të përshtatshëm të skajeve, qosheve apo oxhaqeve;
• Kryejnë riparime të ndryshme kur është e nevojshme;
• Kryejnë mbulime me materiale të ndryshme natyrore tradicionale;
• Japin garanci për punimet;
• Bëjnë preventive për shërbimet e ndryshme që realizohen në njësinë e biznesit;
• Realizojnë detyra të tjera të ngjashme;
• Mbikëqyrin punëtorët e tjerë;
• Kryejnë pastrimin dhe mirëmbajtjen e pajisjeve dhe veglave të punës;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një ndërtues i çative mund të ndërmarrë disa funksione mbikëqyrëse. Ndjekja e shkollës së lartë, çon në diplomimin e specialistëve të këtij profesioni në nivelin inxhinier ndërtimi.

Për të zhvilluar aktivitet privat (vetëpunësim) në këtë fushë, ndërtuesit të çative i duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme, të tilla si: mbulues me çakëll, mbulues me petavra, me rrasa, me tjegulla, mbulues çatie me kashtë.