5411Zjarrfikës

Përshkrimi

Zjarrfikësi merret me parandalimin dhe shuarjen e zjarrin, përpiqet të shpëtojë njerëz, pasurinë dhe mallra të tjera gjatë dhe pas aksidenteve të mëdha. Ai/ajo ndihmon në emergjenca të tjera për mbrojtjen e jetës dhe pronës. Ai/ajo informon publikun në lidhje me parandalimin e zjarreve, aksidenteve apo emergjencave të tjera. Ai/ajo mund të punësohet në kompani shërbimesh të mbrojtjes kundra zjarrit, shërbime të emergjencave civile etj.

Detyrat kryesore

• Kryejnë veprimet e duhura për marrjen e shërbimit, njohjen e rregullave të përgjithshme të ushtrimit të profesionit;
• Kontrollojnë gatishmërinë e mjeteve dhe pajisjeve që përdoren në luftën kundër zjarrit dhe në raste të emergjencave;
• U përgjigjen alarmeve dhe thirrjeve të tjera për ndihmë (në raste të zjarrit apo emergjenca të tjera);
• Japin dhe marrin informacionet dhe urdhrat e duhura eprorëve apo vartësve sipas kërkesave dhe kushteve të paracaktuara;
• Shkojnë me shpejtësi në zonën e zjarrit apo të ngjarjeve të emergjencës duke gjetur rrugët më të shkurtra dhe më të përshtatshme;
• Inspektojnë zonën e vendit të ngjarjes dhe kërkojnë ndërhyrje më të specializuara në se është e nevojshme;
• Shtrijnë tubat sipas distancës së duhur për fikjen e zjarrit;
• Montojnë, vendosin shkallët për ndërhyrjet në lartësi;
• Bëjnë shkëputjen e rrymës elektrike në objekt dhe izolimet e duhura sipas intensitetit të zjarrit apo rastet e tjera të ndërhyrjes emergjente;
• Bëjnë shuarjen e zjarrit duke përdorur pajisje të përshtatshme;
• Përdorin pajisje të përshtatshme sipas llojeve të veçanta të zjarrit dhe intensitetit të tyre në ndërmarrjet industriale, karburante etj;
• Përdorin helikopter ose avion për shuarjen e zjarreve në pyje, në zona të gjera apo në raste të ndryshme ndërhyrje emergjencash;
• Parandalojnë dhe fikin zjarrin në aeroplanët e rrëzuar ose dëmtuar;
• Shpëtojnë njerëz, pasuri dhe mallra gjatë dhe pas zjarrit apo fatkeqësive të mëdha duke përdorur pajisje të përshtatshme;
• Parandalojnë ose kufizojnë shpërndarjen e substancave të rrezikshme në raste zjarri; të tilla si: aksidente automobilistike, industriale, kërcënime dhe emergjenca të tjera;
• Kontrollojnë shuarjen e zjarreve duke përdorur pajisjet e posaçme dhe kimikatet e duhura zjarrfikëse sipas llojeve të veçanta të zjarreve;
• Shpëtojnë nga djegia njerëz e ndërtesa që gjenden në situata të rrezikshme;
• Informojnë publikut në lidhje me parandalimin e zjarreve ose aksidenteve;
• Marrin udhëzimet nga oficeri i informacionit për shërbimin e turnit;
• Përgatitin dhe dorëzojnë proces-verbalin e shërbimit të kryer;
• Raportojnë informacionin e duhur tek përgjegjësi;
• Pastrojnë dhe mirëmbajnë pajisjet dhe makineritë e mbrojtjes kundra zjarrit;
• Mbikëqyrin të tjerët;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht për këtë profesion kërkohet përfundimi i një shkolle të mesme.
• Të ketë kryer një kurs formimi profesional për këtë profesion.
• Të jetë e/i aftë fizikisht dhe mendërisht.
• Të plotësojë normat e zhvillimit fizik të kërkuar për këtë profesion.

Informacion shtesë

• Një individ mund të hyjë në profesion si agjent. Me fitimin e eksperiencës dhe me kualifikim shtesë mbas 2 vjetësh mund të kalojë në nivelin agjent i parë zjarrfikësi. Më pas nëpërmjet kualifikimit të mëtejshëm në shkollat profesionale apo trajnimet, një zjarrfikës mund të ndërmarrë disa funksione mbikëqyrëse si: asistent, asistent i parë, krye-asistent etj. duke ngritur shkallët e karrierës në fushën e shërbimit zjarrfikës dhe shërbimeve të emergjencave.
• Ndjekja e shkollës së lartë, çon në diplomimin e specialistëve të këtij profesioni në nivelin oficer.
• Punonjësit në këtë profesion mund të specializohen në fushat e mëposhtme, të tilla si: komandant (përgjegjës) i reparti zjarrfikës, patrullues të zonës së zjarrit në pyll, zjarrfikës, zjarrfikës në rastet e aksidenteve ajrore, zjarrfikës për eksplozione të naftës dhe të gazit, etj.