5163Varrmihës dhe ruajtës të kufomave

Përshkrimi

Varrmihësi dhe ruajtësi i kufomave i shërben trupave të njerëzve të vdekur që nga larja deri në ruajtjen e kufomave; si dhe organizimin e funeraleve deri në varrosjen e tyre.

Detyrat kryesore

• Lajnë kufomat përpara kryerjes së veprimeve funerale;
• Pastrojnë dhe veshin trupat e vdekur përpara funeralit;
• Kujdesen dhe riparojnë prerjet, çarjet në pjesë të trupit të vdekur përpara funeralit;
• Kujdesen për organizimin e funeralit;
• Ruajnë, parfumosin, balsamosin kufomat dhe arkivolet përpara varrimit;
• Zbatojnë rregullat bazuar në ligjin për zhvarrosje dhe procedurat e krematoriumit;
• Përgatitin dokumentacionin dhe komunikojnë me institucionet e përcaktuara në zbatim të procedurave;
• Organizojnë njoftimet dhe ndihmojnë në saktësimin e kohës së varrimit;
• Zbatojnë rregullat e mbrojtjes së mjedisit;
• Zbatojnë rregullat e etikës në vendin e punës.

Kërkesat

• Të ketë njohuri mbi kryerjen e këtij profesioni.
• Të dijë të trajtojë klientin me kujdes dhe me dhembshuri duke konsideruar faktin se njeriu i vet është ndarë nga jeta.
• Të dijë të komunikojë me shumë takt me klientin për problemet që kanë të bëjnë me shërbimet e funeralit.
• Të ketë aftësi të kryejë veprimet në kohën e duhur.

Informacion shtesë

Fillimi i punës në këtë profesion nuk kërkon nivel shkollor të specifikuar por me shtimin e cilësisë dhe sasisë së kërkesave është e domosdoshme të kryhen trajnime e kualifikime sidomos për rastet e ndërhyrjes së riparimit të pamjes së kufomave dhe krematoriumit. Njohja e mirë e kuadrit ligjor në fuqi ndihmon në zbatimin e procedurave të rregullta ligjore.