5154Punonjës shërbimi në hotele, zyra dhe njësi të tjera

Përshkrimi

Pastrues, mbikëqyrës të mirëmbajtjes në hotele, zyra dhe njësi të tjera organizojnë, mbikëqyrin dhe kryejnë veprimtari mirëmbajtëse me qëllim që të mbajnë pastër dhe me rregull ambientin e brendshëm, mobilimin dhe mjetet e pajisjet e tjera në këto institucione.

Detyrat kryesore

• Organizojnë dhe ndajnë punën për pastruesit dhe mirëmbajtësit vartës;
• Mbikëqyrin punën e pastrimit, mirëmbajtjen dhe punën e vartësve;
• Merren vetë me punë pastrimi, mirëmbajtje dhe riparime të thjeshta, si dhe ndërtime të vogla në ambientin ku punojnë;
• Kujdesen për pompat, furrat, kaldajat dhe sigurojnë ujë të ngrohtë dhe ngrohje në ambientet e hoteleve, zyrave apo konvikteve;
• Kujdesen të ruajnë ambient të qetë duke moderuar sqaruar për sjelljen e vizitorëve në rast të zhurmës së lartë apo keqtrajtim të pronës;
• Ofrojnë shërbime të thjeshta për banorët/qiramarrësit në mungesë të tyre;
• Njoftojnë manaxherët/pronarët e ndërtesave në raste dëmtimesh e nevoje për riparime;
• Organizojnë patrullimin për sigurinë e pronës;
• Informojnë vizitorët për shërbimet e ofruara nga banesa/hoteli/konvikti;
• Informojnë studentët në konvikt për respektimin e orarit, masat e sigurisë dhe mosveprimet për mbrojtjen e pronës;
• Regjistrojnë dëmet ose sjelljet e parregullta të studentëve në konvikt;
• Ndihmojnë në plotësim dhe ruajnë formularët e plotësuara nga banorët/vizitorët;
• Zbatojnë rregullat e mbrojtjes së mjedisit;
• Zbatojnë rregullat e etikës në vendin e punës;
• Zbatojnë rregullat e sigurimit teknik në punë.

Kërkesat

• Shkollimi i mesëm është i mjaftueshëm por vazhdimi i kualifikimeve nëpërmjet trajnimeve jep avantazhe për punësim më të shpejtë.
• Të njohë parimet dhe proceset në dhënien e shërbimeve ndaj klientëve.
• Të njohë procedurat e marrjes në punë të personelit, përzgjedhjen, trajnimet, kompensimin, përfitimet etj.
• Të njohë teknikat e drejtimit të punës, koordinimin e njerëzve dhe burimet që zotëron.
• Të jetë i/e aftë të transmetojë qartë informacionin dhe idetë përkundrejt të tjerëve.
• Të dijë të dëgjojë e të kuptojë informacionin dhe idetë që i jepen nga eprorët e mundshëm.
• Të dijë të përputhë kohën dhe veprimet e veta me kohën e veprimet e të tjerëve.
• Të dijë të zgjedhë dhe të përdorë veglat e duhura për të kryer operacionet e punës.

Informacion shtesë

• Përkushtimi, serioziteti, sjellja e kulturuar të bëjnë më të qëndrueshëm në punë.