5141Parukierë/berberë

Përshkrimi

Parukieri, berberi kryen larje të kokës, lyerje me bojë flokësh, prerje, krehje dhe stilim të flokëve, rruajtje dhe shkurtim të mjekrës apo mustaqeve. Ai/ajo kryen trajtim të flokëve dhe ofron këshilla për kujdesin e flokëve dhe për produktet e bukurisë. Ai/ajo mund të punësohet në kompani shërbimesh parukerie, apo të vetëpunësohet.

Detyrat kryesore

• Presin klientin në vendin e punës;
• Përdorin katalogë të ndryshëm për bojën apo modelin e flokut;
• Diskutojnë me klientët për kërkesat e tyre;
• Kryejnë larje të flokëve;
• Kryejnë prerje të flokëve sipas kërkesës së klientit;
• Lyejnë flokët me bojëra flokësh duke përdorur solucionet e duhura apo shampo kolor, sipas kërkesës së klientit dhe llojit të flokut;
• Kryejnë krehje të flokëve sipas kërkesës së klientit;
• Japin forma dhe valëzim flokëve;
• Stilojnë flokët sipas kërkesës së klientit dhe natyrës së eventeve;
• Kryejnë zgjatim ose shtim të flokut;
• Kryejnë trajtime të ndryshme të flokut;
• Përshtatin paruke sipas kërkesës të klientëve;
• Ofrojnë këshilla për kujdesin e flokut,
• Ofrojnë këshilla për produktet e bukurisë;
• Kryejnë mbledhjen e pagesave;
• Rruajnë mjekrën dhe mustaqet;
• Kryejnë prerje, zvogëlim dhe zbukurim të mjekrës dhe mustaqeve;
• Kryejnë llogaritje të thjeshta për shitjet dhe blerjet e bëra;
• Komunikojnë me kolegët dhe eprorët;
• Pastrojnë vendin dhe instrumentet e punës;
• Realizojnë detyra të tjera të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i arsimit të detyruar.
• Të ketë kryer një kurs formimi profesional për këtë profesion.
• Të jetë i/e aftë fizikisht dhe mendërisht.

Informacion shtesë

• Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale apo trajnimit nëpërmjet punës, mund të ndërmarrë disa funksione mbikëqyrëse duke ngritur shkallët e karrierës si manaxher i një salloni bukurie.
• Punonjësit në këtë profesion mund të specializohen në fushat e mëposhtme, të tilla si: Berber, Parukierë, Parukierë për studio apo për skenë.
• Për hapjen e një biznesi privat në këtë fushë kërkohet regjistrimi në OKR sipas ligjeve në fuqi.