4224Nëpunës në agjencitë e udhëtimit

Përshkrimi

Nëpunësi në agjencitë e udhëtimit merret me pritjen dhe konsultimin e klientit duke u siguruar atyre informacionin e kërkuar. Ai siguron, organizon dhe rregullon itinerare të udhëtimit dhe pranon rezervime të nevojshme për udhëtim dhe akomodim kur kërkohet nga klienti apo gupe personash. Nëpunësi i agjencisë së udhëtimit jep informacione lidhur me shërbimet e ndryshme që kryhen në njësinë e tij ose informacione të tjera shtesë kur është e nevojshme. Ai mund të punësohet në kompani të ndryshme shërbimesh udhëtimi.

Detyrat kryesore

• Mirëpresin klientët në njësinë e vet të shërbimit;
• Këshillojnë klientin për itineraret e udhëtimit;
• Sigurojnë dhe përgatitin itineraret e udhëtimit;
• Bëjnë rezervimet dhe konfirmimet e nevojshme;
• Japin bileta, fletë-pagesa dhe dokumente të tjera;
• Ndihmojnë klientin në marrjen e dokumenteve të nevojshme të udhëtimit;
• Sigurojnë vizat, nëse është e nevojshme;
• Mbajnë shënime lidhur me oraret e takimeve në dispozicion;
• Japin informacione lidhur me shërbimet e ndryshme që kryhen në njësinë e tyre;
• Përdorin pamflete, broshura dhe forma të tjera informative në shërbim të klientëve;
• Pranojnë dhe iu përcjellin mesazhe personave të duhur duke përdorur telefon, fax ose internet;
• Rishikojnë shënimet përkatëse për klientët, për oraret apo kërkesa të tjera të tyre;
• Organizojnë udhëtime turistike, udhëtime për pushime apo biznes, për individë apo grupe dhe kryejnë shitjen e tyre;
• Përgatitin faturat për shërbimin e kryer;
• Kryejnë marrjen e pagesës së faturave;
• Bëjnë llogaritjet e faturave dhe dorëzimin e tyre në arkën, zyrën përkatëse;
• Komunikojnë me klientin dhe japin informacionet e duhura kur ka ndryshime në itineraret apo udhëtimet e rezervuara;
• Mbikëqyrin punëtorët e tjerë:
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një shkolle profesionale në këtë fushë;
• Të ketë kryer një kurs formimi profesional për këtë profesion.
• Të ketë një eksperiencë paraprake në këtë fushë
• Të jetë i aftë fizikisht dhe mendërisht.
• Të zotërojë gjuhë të huaja.

Informacion shtesë

Një individ mund të hyjë në profesion si ndihmës. Me eksperiencë dhe me kualifikim shtesë mund të kalojë në nivelin nëpunës i kualifikuar. Më pas nëpërmjet kualifikimit të mëtejshëm në shkollat profesionale apo trajnimit nëpërmjet punës, një nëpunës në agjencitë e udhëtimit mund të ndërmarrë disa funksione mbikëqyrëse duke ngritur shkallët e karrierës në manaxheri në një njësi shërbimi.