3118Teknikë projektues

Përshkrimi

Tekniku i projektimit përfshihet në dizenjimin, skicimin dhe projektimin e hapësirave publike ose private, objekteve të ndryshme të banimit apo shërbimit, si edhe në dizenjimin, skicimin dhe projektimin e materialeve të ndryshme publicitare, reklamuese apo ndërgjegjësuese në kompani të madhësive të ndryshme. Tekniku i projektimit zbaton të gjitha rregullat dhe kriteret bazë të vendosura me ligj që kanë të bëjnë me hapësirat, objektet apo materialet e projektuara. Ai mund të punësohet në kompani ndërtimi, studio arkitekture, studio dizajni, agjenci marketingu. Gjithashtu, mund regjistrohet si i vetëpunësuar.

Detyrat kryesore

• Komunikojnë me klientin që porosit projektin;
• Mbledhin të dhëna që i shërbejnë për projektin me anë të hulumtimit;
• Shqyrtojnë të gjitha materialet e vëna në dispozicion nga klienti dhe ato të mbledhura nga hulumtimi;
• Fotografojnë zonën apo objektet që kanë lidhje me projektin;
• Kryejnë matje në terren;
• Hedhin në skicë gjurmën e objektit;
• Dizajnojnë me dorë në letër skicën e parë;
• Hedhin në programin kompjuterik, AutoCad, skicën fillestare;
• Prezantojnë tek eprori draftin e parë të skicës;
• Ndryshojnë elemente të skicës sipas komenteve të eprorit apo klientit;
• Komunikojnë me inxhinierët e ndryshëm (elektrik, të zbatimit, fizibilitetit) për projektin;
• Dorëzojnë skicën e projektit tek inxhinierët;
• Reflektojnë ndryshimet dhe rregullimet e sugjeruara nga inxhinierët;
• Prezantojnë me qëllim marrjen e aprovimit të projektit tek institucionet përkatëse (bashki, komuna, etj.);
• Reflektojnë ndryshime të kërkuara (nëse ka) nga institucionet përkatëse;
• Mbajnë kontakt të vazhdueshëm me klientin për qëllime përditësimi mbi ecurinë e projektit dhe koordinon procesin e ndonjë ndryshimi të mundshëm me inxhinierët;
• Bashkëpunojnë me kolegët për shkëmbimin dhe përditësimin e informacionit në lidhje me projektin;
• Raportojnë tek eprori për ecurinë e projektit dhe problematika të mundshme që mund të hasen gjatë punës;
• Dixhitalizojnë me anë të pajisjeve të ndryshme, harta, objekte, etj.;
• Krijojnë karta projekti (hedh në letër ose kompjuter idetë e shprehura me fjalë);
• Respektojnë politikat e brendshme të punës dhe procedurat e hartuara nga Kompania;
• Zbatojnë kodin e etikës të miratuar nga manaxhimi;
• Zbatojnë rregullat e sigurimit dhe mbrojtjes së shëndetit;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet të ketë diplomë tre vjeçare (bachelor); në disa raste eksperienca disa vjeçare e punës mund të zëvendësojë diplomën bachelor;
• Të ketë njohuri të mira në përdorimin e programeve kompjuterike (si p.sh. Computer Aided Design/CAD, Paketën Adobe: Ilustrator, Indesign, Photoshop).

Informacion shtesë

Një individ mund të hyjë në profesion pasi të ketë marrë diplomë bachelor në një nga degët Arkitekturë, Planifikim urban, Inxhinieri ndërtimi, Inxhinieri elektronike.

Me kryerjen e studimeve në nivel master dhe dy viteve eksperiencë pune, tekniku i projektimit mund të kalojë në nivelin e Arkitektit, Planifikuesit Urban, Inxhinierit të ndërtimit, Drejtor Arti.

Për të zhvilluar aktivitet privat (vetëpunësim) në këtë fushë nevojitet si kusht minimal Licenca e profesionit të lirë të Arkitektit, Planifikuesit Urban, Inxhinierit.