2433Specialistë të shitjeve teknike dhe mjekësore (Përjashtuar TIK)

Përshkrimi

Specialistët e shitjeve teknike dhe mjekësore (përjashtuar TIK)përfaqësojnë kompanitë apo organizatat në shitjen e një sërë produktesh e shërbimesh industriale, teknike, mjekësore e farmaceutike tek organizma të tjerë industriale, biznesi, profesionale apo të tjera. Ata studiojnë kushtet e tregut dhe konkurrentët dhe këshillojnë drejtuesit për potencialet e tregut, për tendencat e konsumatorit dhe produktete reja.

Detyrat kryesore

• Përpilojnë listën e bizneseve të klientëve të mundshëm duke përdorur burime të ndryshme;
• Studiojnë dhe përditësojnë njohuritë e veta mbi produkte dhe shërbime të organizatës ku punojnë dhe të konkurrentëve, si dhe ndjekin kushtet dhe ndryshimet e tregut;
• Zhvillojnë vizita të rregullta te bizneset, klientët potencialë, për të vendosur kontakte, për të promovuar produktet e tyre dhe për të krijuar mundësi shitjeje;
• Kuptojnë nevojat dhe kapacitetet financiare të klientit dhe rekomandojnë produktin apo shërbimin e përshtatshëm;
• Japin mendim për dizenjimin e produktit, kur produkti apo shërbimi kërkohet të përshtatet posaçërisht sipas nevojave të klientit;
• Përgatitin raporte apo propozime për prezantimin e shitjeve, për demonstrimin e produkteve dhe përfitimet nga përdorimi i tyre;
• Llogaritin kostot e instalimit dhe mirëmbajtjes së pajisjes apo shërbimit, në rastet kur produkti instalohet te klienti;
• Monitorojnë nevojat e ndryshuara të klientit dhe aktivitet e konkurrentit dhe raportojnë këto zhvillime te manaxheri i shitjeve;
• Negociojnë çmime dhe termat e kontratës dhe përgatitin dhe administrojnë kontratat e shitjes;
• Organizojnë furnizimin ose dërgimin e produktit, instalimin e pajisjes dhe ofrimin e shërbimeve;
• Shpjegojnë sipas rastit, funksionimin e pajisjes, udhëzimet përkatëse që shoqërojnë pajisjen apo produktin;
• Bëjnë vetë një demonstrim të produktit tek klienti për të treguar funksionimin dhe facilitetet e tij;
• Garantojnë kthimin e produktit në rast defekti sipas kushteve të kontratës me klientin;
• Raportojnë te manaxheri i shitjeve për shitjet e bëra dhe për potencialet e tregut për produkte dhe shërbime;
• Konsultohen me klientët pas shitjeve për të garantuar kënaqësinë e tyre, zgjidhin çdo problem dhe japin mbështetje të vazhdueshme për ta;
• Sigurojnë kënaqësinë maksimale të klientit për produktin dhe shërbimet e organizatës;
• Rritin profesionalizimin e vet në këtë sektor;
• Respektojnë kushtet e sigurimit teknik dhe mjedisor.

Kërkesat

• Preferohet arsim i lartë;
• Kualifikime në shitje, marketing, shërbim me klientin etj.;
• Aftësi të mira komunikuese;
• Zotësi për të vepruar.

Informacion shtesë

Një individ mund të hyjë në profesion si agjent tregtar, agjent shitjeje, ndërmjetës tregtar etj., duke pasur si fillim arsimin e mesëm. Por me kryerjen e arsimit të lartë dhe kualifikime ne këtë sektor, mund të punësohet si specialist i shitjeve tregtare dhe teknike. Më eksperiencë dhe kualifikime të mëtejshme mund të marrë dhe role drejtuese. Përfaqësuesit e shitjeve tregtare dhe teknike punësohen kryesisht në organizata biznesi private.