2423Specialistë personeli dhe të zhvillimit të karrierës

Përshkrimi

Specialistët e personelit dhe zhvillimit të karrierës ofrojnë shërbime profesionale të lidhura me politikat e personelit, rekrutimit në punë, analizës së vendeve të punës, këshillimit të karrierës dhe orientimit profesional. Ata përgatisin përshkrimet e profesioneve, specifikimet e punës, informacionin për punësimin apo pozicionin e punës dhe sugjerojnë ndryshimet në sistemet e klasifikimit të profesioneve.

Detyrat kryesore

• Këshillojnë mbi politikat e rekrutimit të punonjësve, mbi vendet e punës, trajnimet profesionale, promovimet në punë, kompensimet dhe për marrëdhëniet punëdhënës-punëmarrës në fushat e politikës së personelit;
• Kryejnë detyrat e specialistit të personelit, duke u marrë konkretisht me rekrutimet, përzgjedhjen, trajnimet, promocionin, kompensimet për personelin, lejet e tyre etj.;
• Monitorojnë performancën e personelit dhe prezencën e tyre;
• Kujdesen për shëndetin, sigurinë dhe mirëqenien e gjithë punonjësve;
• Miratojnë përshkrimet e punës dhe bëjnë njoftimet-reklamë për punë të reja të organizatës;
• Këshillojnë punonjësit mbi ligjet e punësimit, mbi politikat dhe rregullat e vendosura nga vetë organizata apo institucioni;
• Këshillojnë manaxherët për lëvizjet e personelit në funksion të realizimit sa më të mirë të detyrave dhe përmbushjes së misionit të organizatës;
• Sigurojnë që kandidatët të kenë të drejtën për të punuar në organizatë;
• Negociojnë sipas rastit, kontratat, rrogat, kushtet e punës dhe pagesat e papunësisë, apo lejeve të pushimit mes personelit dhe përfaqësuesve të organizatës;
• Studiojnë dhe analizojnë në të gjitha këndvështrimet pozicionet e punës që kryhen në një organizatë apo institucion publik a privat;
• Kryejnë intervista me punëtorët, manaxherët dhe supervizorët dhe përshkruajnë e përcaktojnë me detaje pozicionin e punës si dhe detyrat nga gjithë informacioni që kanë grumbulluar;
• Përgatisin informacionin për punësimin apo pozicionin e punës në sistemet e klasifikimit të profesioneve;
• Studiojnë dhe këshillojnë individët mbi mundësitë e punësimit, zgjedhjet e karrierës dhe arsimimin apo trajnimin e mëtejshëm ;
• Japin këshilla për orientimet profesionale;
• Ndjekin dhe studiojnë hyrjen e profesioneve të reja, i përshkruajnë dhe sugjerojnë ndryshimet përkatëse në sistemet e klasifikimit të profesioneve;
• Ndjekin me vëmendje ndryshimet ligjore, zhvillimet ekonomike, trendet e punësimit
• Monitorojnë dhe mbikëqyrin punën e personelit;
• Rritin aftësitë e veta profesionale në këtë sektor.

Kërkesat

• Preferohet arsim i lartë;
• Kurse dhe kualifikime profesionale;
• Aftësi analitike.

Informacion shtesë

Një individ mund të nisë një punë si ndihmës/asistent në sektorët e personelit dhe zhvillimit të karrierës. Me arsim të lartë, kualifikime të ndryshme mund të marrë detyrën e specialistit të personelit dhe zhvillimit të karrierës. Një specialist i shërbimeve të personelit dhe zhvillimit të karrierës mund të punojë në institucione arsimore dhe kërkimore, institucione shtetërore por dhe organizata biznesi.