8156Punëtorë të makinave të prodhimit të këpucëve dhe galanterisë

Përshkrimi

Punëtori të makinave të prodhimit të këpucëve dhe galanterisë kryen punime të ndryshme me makineri për qepjen e pjesëve, elementëve dhe prodhimin e këpucëve, valixheve, çantave, rripave apo pajisjeve të tjera prej lëkure. Ai monitoron dhe operon me makina një gjilpërëshe dygjilpërëshe, presë, makineri temperimi, makineri për përgatitje kallëpi etj. Ai i përgatit për punë dhe i mirëmban këto makineri, si dhe kryen punime qepjeje e qëndisjeje me dorë apo punime shtesë për vendosje aksesorësh. Ai mund të punësohet në kompani të shërbimeve të konfeksioneve (prodhimit të këpucëve) apo të vetëpunësohet.

Detyrat kryesore

• Veshin uniformën dhe parapërgatitin vendin e punës;
• Bëjnë kontrollin dhe përgatitjen e makinës së punës;
• Përgatitin makinën e matjes së lëkurës dhe bëjnë matjet e duhura;
• Vendosin thikat në makinën e prerjes (presës) së lëkurës dhe presin elementë përbërës të këpucës, valixhes, çantës, rripit apo pajisjeve të tjera prej lëkure sipas modelit të dhënë;
• Bëjnë përgatitjen e makinave të punës për qepje;
• Bëjnë përzgjedhjen e fijeve të duhura për punime të ndryshme sipas modelit të dhënë;
• Përgatitin dhe punojnë me makinën e zmusimit të lëkurës apo gomës;
• Operojnë me makina njëgjilpërëshe dhe dygjilpërëshe për qepjen e pjesëve, elementëve të këpucës, valixhes, çantës, rripit apo pajisjeve të tjera prej lëkure;
• Operojnë me makina njëgjilpërëshe dhe dygjilpërëshe për qepjen e astarit të këpucës, valixhes, çantës, rripit apo pajisjeve të tjera prej lëkure;
• Përgatitin pjesën e sipërme të këpucës në kallëp dhe operojnë me makineritë përkatëse (në makinën e premontes);
• Përgatitin pjesën e prapme të këpucës në kallëp dhe operojnë në makineri përkatëse (makina kalciera);
• Kryejnë kthimin dhe montimin e këpucës me shollën;
• Kryejnë ngjitjen e pjesës së sipërme të këpucës me shollën, me mastiç, në makineri (presë);
• Operojnë me makinerinë e temperimit për dhënien e lustrës së këpucës;
• Vendosin aksesorët e nevojshëm me makineri ose me dorë;
• Bëjnë punimet e duhura, qepjeje dhe qëndisjeje, me dorë dhe pastrimin e fijeve;
• Operojnë dhe monitorojnë makina që prodhojnë valixhe, çanta, rripa dhe pajisje të tjera prej lëkure;
• Kryejnë detyra përfundimtare paketimi dhe ambalazhimi;
• Realizojnë detyra të tjera të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një shkolle profesionale në këtë fushë.
• Të ketë kryer një kurs formimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një punëtor i makinave të prodhimit të këpucëve dhe galanterisë mund të ndërmarrë disa funksione mbikëqyrëse duke ngritur shkallët e karrierës në nivelin e kontrollorit të cilësisë, përgjegjësit të prodhimit. Ndjekja e shkollës së lartë, çon në diplomimin e specialistëve të këtij profesioni në nivelin e inxhinierit të tekstileve.

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme të tilla si: prestar i lëkurës me makineri, makinist për prodhim këpucësh, punëtor qëndisjeje faqe këpucësh me dorë, punëtor qepës faqe këpucësh me makineri, presues i faqeve të këpucëve me makineri etj.