8155Punëtorë të makinave të përgatitjes së lëkurës dhe gëzof

Përshkrimi

Punëtorët e makinave të përpunimit të lëkurës dhe gëzofit operojnë dhe monitorojnë makineri të ndryshme të cilat përgatitin apo përpunojnë lëkurën ose gëzofin. Ata regjin, pastrojnë, lajnë, thajnë, lustrojnë, ngjyrosin, etj., lëkurët e kafshëve apo gëzofët për të prodhuar lëkurën e përpunuar të gatshme si lëndë e parë për prodhime lëkure apo gëzofi, duke zbatuar rreptësisht rregullat e sigurimit teknik dhe të mbrojtjes së mjedisit.

Ai mund të punësohet njësi ekonomike të përpunimit të lëkurës dhe gëzofit në pozicione pune të tilla si: punëtor i përpunimit të lëkurës me makineri, punëtor i përpunimit të gëzofit me makineri, etj.

Detyrat kryesore

• Respektojnë rregullat e mbrojtjes së mjedisit;
• Përgatitin lëkurën për ta hedhur në lavatriçe;
• Pastrojnë lëkurën nga papastërtitë;
• Operojnë dhe monitorojnë lavatriçen për larje;
• Aplikojnë solucion kimik për heqjen e leshit nga lëkura;
• Heqin leshin nga lëkura e kafshës me pajisjet përkatëse;
• Operojnë dhe monitorojnë makinerinë për zbutjen e dhjamit nga lëkura apo gëzofi;
• Operojnë dhe monitorojnë makinerinë (skanatriçe) për heqjen e mishit dhe të dhjamit nga lëkura/gëzofi;
• Operojnë dhe monitorojnë makinerinë për përpunimin fillestar të lëkurës në Pikle/VVet blue;
• Seleksionojnë cilësinë e lëkurave sipas llojit të tyre;
• Operojnë dhe monitorojnë makinerinë për të zvogëluar trashësinë e lëkurës në arritjen e një përmase uniformë;
• Operojnë dhe monitorojnë makinerinë për zbutjen e lëkurës;
• Operojnë dhe monitorojnë makinerinë për tërheqjen e lëkurës (hekurosjen);
• Trajtojnë sipërfaqen e lëkurës me solucionin përkatës dhe operojnë makinerinë e lustrimit të lëkurës për t’i dhënë shkëlqimin;
• Operojnë dhe monitorojnë makinerinë për ngjyrosjen apo çngjyrosjen e lëkurës;
• Mirëmbajnë makineritë dhe kryejnë riparime të thjeshta;
• Komunikojnë me kolegët dhe eprorët;
• Respektojnë rregullat e sigurimit teknik;

Kërkesat

• Zakonisht kërkohet përfundimi i arsimit të detyruar.
• Të ketë kryer një kurs formimi profesional për këtë profesion.
• Të jetë e/i aftë fizikisht e mendërisht.

Informacion shtesë

Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale apo trajnimit nëpërmjet punës, mund të ndërmarrë disa funksione mbikëqyrëse duke ngritur shkallët e karrierës në përgjegjës prodhimi. Ndjekja e shkollës së lartë, çon në diplomimin e specialistëve të këtij profesioni në nivelin inxhinier tekstili.

Punonjësit në këtë profesion mund të specializohen në fushat e mëposhtme, të tilla si: punëtor i pastrimit të lëkurës nga mishi, me makineri , regjës lëkure, ngjyrosës lëkure, etj.

Për të zhvilluar aktivitet privat (vetëpunësim) në këtë fushë, duhet regjistrimi për ushtrim aktiviteti si person fizik apo juridik, sipas rastit