8122Punëtorë të përpunimit të metalit

Përshkrimi

Punëtori i përpunimit të metaleve vepron dhe manovron me makineri dhe pajisjet e duhura gjatë proceseve të punës në uzina të përpunimit të metaleve. Ai kryen monitorimin, kontrollin e makinerive dhe pajisjeve dhe manovron me to për të ruajtur dhe siguruar parametrat teknikë të duhur të procesin e konvertimit të xeherorit mineral në metale, duke zbatuar rreptësisht rregullat përkatëse të sigurimit teknik për proceset e punës. Ai mund të punësohet në uzina apo fabrika të përpunimit dhe shkrirjes së metaleve.

Detyrat kryesore

• Veshin uniformën dhe pajisjet mbrojtëse të punës;
• Kontrollojnë makineritë dhe pajisjet e punës, si dhe vendin e punës;
• Përgatitin dhe përshtatin makineritë dhe pajisjet e përpunimit të metaleve për vazhdimin e proceseve të punës;
• Depozitojnë mineralin dhe materialin ndihmës (koks dhe kuarc) në vaskat përkatëse:
• Marrin kampionet e mineralit dhe materialit ndihmës për kryerjen e analizave kimike;
• Përgatitin lëndën e parë, duke e copëtuar në përmasat e caktuara nga 10-70 mm;
• Vendosin mineralin e copëtuar në bunkerin përkatës;
• Vendosin materialin ndihmës në bunkerin përkatës;
• Kryejnë dozimin e materialit nëpërmjet peshoreve përkatëse automatike;
• Dërgojnë materialet e dozuara në bunkerin e furrës;
• Transportojnë materialin e dozuar nga bunkeri në furrë elektrike;
• Kontrollojnë dhe monitorojnë të gjithë parametrat e procesit të shkrirjes së materialit në furrë;
• Verifikojnë kushtet specifike të përpunimit, duke siguruar parametra në përputhje me kartën teknologjike të prodhimit përkatës;
• Manovrojnë me elektrodat duke mbajtur rryma dhe tensione të barabarta (parametrat e shkrirjes) gjatë procesit të shkrirjes së materialit;
• Operojnë me makineritë apo pajisjet e duhura për proceset e bluarjes(copëtimit) dhe përzierjes së materialeve;
• Monitorojnë procesin e shkrirjes duke zbatuar rreptësisht rregullat e sigurimit teknik të punës për këtë proces.

Derdhja

• Hapin birën e derdhjes nëpërmjet makinerisë përkatëse, duke ndihmuar me oksigjen;
• Shoqërojnë derdhjen e materialit të shkrirë duke e ndarë në kova për metal (ferrokromin) dhe në kova për skorie (bazuar në peshën specifike të materialit);
• Mbyllin furrën me tapa argjile, me dorë ose me makineri përkatëse (tapatrice);
• Shoqërojnë ndarjen përfundimtare të metalit nga skoria;
• Derdhin metalin (kromin) në vaska të sheshta;
• Kontrollojnë dhe monitorojnë procesin e ftohjes së metalit deri në copëtimin e tij;
• Mbledhin produktin e gatshëm (metalin) dhe e dërgojnë në repartin e copëtimit;
• Copëtojnë metalin në fraksione të ndryshme sipas kërkesave;
• Marrin kampion metali dhe skorie dhe i dërgojnë për analizë;
• Magazinojnë metalin e prodhuar me fletë analizën përkatëse;
• Copëtojnë dhe seleksionojnë skorien duke marrë përqindje të vogla metali;
• Dërgojnë pjesën e skorieve të seleksionuara, me përqindje të vogla metali, për riciklim në furrë;
• Pastrojnë dhe mirëmbajnë makineritë dhe pajisjet e punës;
• Pastrojnë dhe mirëmbajnë elektrodat dhe dritaret e furrës;
• Raportojnë për problemet dhe avaritë e dala gjatë punës tek personat përgjegjës;
• Regjistrojnë të dhënat e prodhimit dhe problemet e dala gjatë proceseve të punës;
• Komunikojnë në mënyrë profesionale me kolegë dhe eprorë;
• Zbatojnë rregullat e sigurimit teknik dhe të mbrojtjes së mjedisit;

Kërkesat

• Zakonisht kërkohet një kurs formimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor derdhës i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një punëtor i përpunimit të metalit mund të ndërmarrë funksionin e vëzhguesit dhe panelistit. Ai mund të ndërmarrë edhe funksione mbikëqyrëse si përgjegjës turni dhe teknologu. Ndjekja e shkollës së lartë, çon në diplomimin e specialistëve të këtij profesioni në nivelin e inxhinierit metalurg.

Punonjësit në këtë profesion mund të specializohen në fushat e mëposhtme, të tilla si: Makinist i bashkimit të metaleve, i derdhjes, i lidhjeve së metaleve, punëtor furrnalte, punëtor i harkut elektrik të furrnaltës, vëzhgues, panelist, teknolog etj.