7224Punëtorë dhe montues të makinerive të tjera

Përshkrimi

Punëtori dhe montuesi i makinerive të tjera kryen përshtatjen, montimin, instalimin, mirëmbajtjen dhe riparimin e ashensorëve, elevatorëve industrial e makinerive të tjera duke bashkëpunuar me inxhinierë të tjerë dhe duke zbatuar parametrat dhe standardet e paracaktuara. Ai kryen matje të ndryshme para e pas montimit apo riparimit të defekteve. Ai mund të punësohet në kompani të shërbimeve të montimit apo mirëmbajtjes së ashensorëve, elevatorëve industrial e makinerive të tjera apo të vetëpunësohet.

Detyrat kryesore

• Parapërgatitin vendin e punës;
• Ndjekin instruksionet teknike të montimit dhe riparimit të pajisjes;
• Këshillohen me inxhinierin zbatues të objektit për makinerinë që do të montojnë dhe kërkesat e projektit;
• Bëjnë kontrollin e objektit ku do të bëhet montimi i ashensorit, elevatorit apo ndonjë lloj tjetër makinerie;
• Kryejnë matjet teknike të duhura të pusit të ashensorit apo vendit ku do të montohet elevatori;
• Bëjnë preventivin e të gjitha pajisjeve dhe mjeteve të duhura për montim duke bashkëpunuar me inxhinierë të tjerë;
• Bëjnë montimin e guidave (shinave) ku montohet ashensori;
• Kryejnë montimin e platformës dhe kundrapeshës në rastin e ashensorit elektrik;
• Kryejnë montimin e platformës dhe pistonit në rastin e ashensorit hidraulik;
• Montojnë motorin e ashensorit sipas planimetrisë dhe standardeve të paracaktuara;
• Bëjnë instalimet elektrike dhe sistemin e ndriçimit të ashensorit;
• Kryejnë sistemin e ndriçimit të sallës së makinerive (komandimit);
• Bëjnë instalimin e ndriçimit të emergjencës për rastin e fikjeve të dritave;
• Bëjnë vënien e impiantit në lëvizje me anë të pultit (në tira);
• Bëjnë montimin e dyerve të katit;
• Kryejnë montimin e kabinës dhe operatorit të dyerve;
• Bëjnë vendosjen e butonave të kateve si dhe të kabinës;
• Bëjnë kontrollin e valvulave në zbritje të ashensorit;
• Bëjnë kontrollin e presionit të motorit në ngjitje të ashensorit.
• Bëjnë riparimin e defekteve në rastin kur pjesët nuk janë shumë të dëmtuara dhe pranojnë riparim;
• Kryejnë zëvendësimin e pjesëve të dëmtuara në rastet kur pjesët janë të dëmtuara dhe nuk pranojnë riparim ose kostoja e riparimit nuk është ekonomike;
• Bëjnë vajosjen, grasatimin e kavove, volantit të motorit;
• Bëjnë riparimin e sistemit të lubrifikimit në rastin e ashensorit hidraulik;
• Bëjnë mirëmbajtjen periodike, duke ndjekur një grafik që bazohet në orët e punës;
• Kryejnë kontrollin e mekanizmit të uljes dhe ngritjes së ashensorit;
• Kryejnë kontrolle me aparatura sinjalizuese për përcaktimin e defektit;
• Bëjnë matjen e kabllove të tensionit;
• Kryejnë kontrolle teknik, duke iu referuar parametrave të caktuar;
• Kryejnë matje të ndryshme për pajisjet përkatëse për identifikimin e problemeve të dala;
• Bëjnë matjen e baterive që përdoren për ulje emergjente;
• Bëjnë lyerje me bojë, stukime, axhustime të ndryshme për dëmtime të vogla;
• Kryejnë shërbime të mirëmbajtjes periodike të sistemeve apo pajisjeve, duke përdorur vegla dhe pajisje të nevojshme për këtë qëllim;
• Koordinojnë punën e tyre me punën e inxhinierëve, teknikëve dhe personelit tjetër të mirëmbajtjes;
• Raportojnë në mënyrë periodike te eprorët;
• Bëjnë preventiv për shërbimet e ndryshme që realizohen në njësinë e biznesit;
• Mbajnë shënime për mirëmbajtjen dhe riparimin e kryera gjatë punës;
• Zbatojnë rregullat e sigurimit dhe mbrojtjes së shëndetit;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në këtë profesion si ndihmës. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një punëtor dhe montues i makinerive të tjera mund të ndërmarrë disa funksione mbikëqyrëse duke ngritur shkallët e karrierës në nivel specialisti e manaxheri. Ndjekja e shkollës së lartë, çon në diplomimin e specialistëve të këtij profesioni në nivelin e inxhinierit.

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme, të tilla si: Montues dhe mirëmbajtës ashensori, montues elevatori automat për mbushje dhe ambalazhim të produkteve ushqimore, montues elevatori për transport industrial, në miniera etj.