7213Punëtorë llamarine

Përshkrimi

Punëtori i llamarinës merret me prodhimin, instalimin dhe riparimin e artikujve dhe pjesëve të këtyre artikujve prej llamarina siç janë llamarinë çeliku, bakri, bronzi, alumini, zinku, hekurit të galvanizuar, etj. Ai përpunon, pret, kthen, harkon, bashkon dhe monton elementët e artikujve të tilla për fusha të ndryshme të industrisë, transport, ndërtim, minierë etj. Ai mund të punësohet në kompani të ndryshme që merren me përpunimin e llamarinës apo të vetëpunësohet.

Detyrat kryesore

• Konsultohen me kolegët për porositë e marra nga klientët;
• Bëjnë studimin e projektit të dhënë për përgatitjen e artikujve të llamarinës;
• Bëjnë zbërthimin në elementë përbërës të projektit të dhënë;
• Bëjnë skicimin e nevojshëm sipas kërkesës, rastit;
• Llogaritin koston dhe bëjnë preventivin përkatës;
• Bëjnë planifikimin e bazës materiale të nevojshme për realizimin e projektit;
• Sigurojnë bazën materiale sipas preventivit;
• Përzgjedhin materialin që duhet të punojnë sipas trashësisë (spresorit);
• Bëjnë përgatitjen paraprake të vendit të punës (veglat , pajisjet, makineritë, kontrollon funksionimin e tyre);
• Bëjnë matjet dhe shënimet përkatëse mbi fletët e llamarinës sipas projektit;
• Bëjnë prerjet e llamarinës;
• Kryejnë kthimin, harkimin e elementëve të prerë të llamarinës etj.;
• Dërgojnë materialin (llamarinës) në repartin e përpunimit me tranxhë-pikatriçe;
• Kryejnë shpimet e nevojshme për bashkimin apo montimin e llamarinës;
• Kryejnë bashkimin e elementeve sipas mënyrave dhe kushteve teknike të kërkuara në projekt (saldim, përçin, vida, bulona, etj.);
• Kontrollojnë saktësinë e montimeve sipas kushteve teknike të projektit;
• Kryejnë punime axhusterie dhe rregullime përfundimtare duke përdorur vegla pajisje apo makineritë e nevojshme për këto punime;
• Bëjnë pastrimin e sipërfaqeve me letër zmeril, furçe teli etj.;
• Kryejnë lyerjen e llamarinës me bojëra kundër ndryshkut dhe korrozionit në se është e nevojshme;
• Kryejnë punimet përfundimtare plotësuese sipas kërkesës së projektit në artikujt e llamarinës;
• Bëjnë dorëzimin e artikujve të prodhuar dhe plotësimin e garancisë së punimeve;
• Bëjnë riparime të artikujve të llamarinës kur është e nevojshme;
• Bëjnë dhe riparojnë enë kuzhine dhe artikuj të tjerë dekorativ llamarine, bakri etj.;
• Bëjnë zbukurues të ndryshme mbi artikujt e prodhuar;
• Kryejnë lustrimin dhe shkëlqimin e këtyre artikujve;
• Bëjnë dhe riparojnë kaldaja, kazanë për ngrohjen e ujit, vaska dhe kontejnerë të tjerë të ngjashëm;
• Instalojnë dhe riparojnë pjesë të llamarinës së automjeteve, anijeve, aeroplanëve etj.;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një kualifikimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Një individ mund të hyjë në profesion si ndihmës punëtor. Me fitimin e eksperiencës dhe me kualifikim shtesë mund të kalojë në nivelin punëtor i kualifikuar. Më pas nëpërmjet kualifikimit të mëtejshëm në shkollat profesionale dhe teknike apo trajnimit nëpërmjet punës, një punëtor llamarine mund të ndërmarrë disa funksione mbikëqyrëse duke ngritur shkallët e karrierës në nivel tekniku. Ndjekja e shkollës së lartë, çon në diplomimin e specialistëve të këtij profesioni në nivelin inxhinier mekanik.

Për të zhvilluar aktivitet privat (vetëpunësim) në fushën e shërbimit metalik duhet regjistrimi për ushtrim aktiviteti si person fizik apo juridik, sipas rastit.

Punonjësit në këtë profesion mund të specializohen në fushat e mëposhtme, të tilla si: saldator, punëtor fletësh metalike për automobila, punëtor fletësh metalike për pajisje shtëpiake, punëtor fletësh metalike për zbukurime, punëtor fletësh metalike për qepena, riparues të artikujve prej llamarine.