621Punonjës të pyjeve dhe sharrëxhinj

Përshkrimi

Punonjësit e pyjeve dhe sharrëxhinjtë planifikojnë, organizojnë dhe kryejnë operacione për të kultivuar, ruajtur dhe shfrytëzuar pyjet dhe plantacionet natyrore. Ata seleksionojnë trungjet e prera sipas vëllimit dhe përdorimit të tyre, si dhe konservojnë, përpunojnë dhe transportojnë lëndën drusore; Ata mund të punësohen në kompani të shërbimeve të ndryshme pyjore apo të vetëpunësohen.

Detyrat kryesore

• Kujdesen për rritjen e drunjve në pyje;
• Vlerësojnë sipërfaqet e tokës për ripyllëzim, duke përzgjedhur e mbjellë pemë dhe fidanë, me mjete të thjeshta dore apo mekanikë të përshtatshme për këto punime;
• Mbjellin, kultivojnë, ruajnë pyjet natyrore dhe plantacionet;
• Kultivojnë, mbjellin dhe pastrojnë nga shkurret;
• Vlerësojnë gjendjen e drunjve që duhen prerë dhe i presin ato duke përdorur sharra të ndryshme sipas nevojave (sharrë dore, elektrike, me zinxhir etj.) apo pajisje të tjera;
• Seleksionojnë dhe stivosin trungjet e prera sipas vëllimit dhe përdorimit të tyre;
• Konservojnë, përpunojnë dhe transportojnë lëndën drusore;
• Kryejnë punimet e nevojshme të tokave pyjore;
• Kryejnë krasitje dhe prerje të nevojshme për zhvillimin normal të drurëve pyjorë;
• Kryejnë dezinfektime të ndryshme për të luftuar dëmtuesit apo barërat e këqija të drurëve pyjorë;
• Kryejnë vjeljen apo mbledhjen e farërave apo produkteve të tjera në pyje;
• Kryejnë shënime apo damkosjen e drurëve pyjorë;
• Kryejnë operacionet e duhura për stazhionimin e drurëve dhe trungjeve;
• Marrin masa për të parandaluar zjarret e mundshme dhe ndihmojnë zjarrfikësit në rastet e zjarreve në pyje;
• Kryejnë shpërndarje apo marketing të produkteve të pyllit;
• Kryejnë shërbime periodike të makinerive dhe pajisjeve të punimeve pyjore dhe i mirëmbajnë ato;
• Realizojnë detyra të ngjashme;
• Mbikëqyrin punëtorët e tjerë;
• Zbatojnë rregullat e sigurimit teknik dhe të mbrojtjes së mjedisit.

Kërkesat

• Zakonisht kërkohet përfundimi i një shkolle profesionale në këtë fushë.
• Të ketë kryer një kurs formimi profesional për këtë profesion.
• Të jetë e/i aftë fizikisht dhe mendërisht.

Informacion shtesë

Për të zhvilluar aktivitet privat (vetëpunësim) në këtë fushë duhet regjistrimi për ushtrim aktiviteti si person fizik apo juridik, sipas rastit.