1343Drejtues të shërbimeve të kujdesit për të moshuar

Përshkrimi

Drejtuesit e shërbimeve të kujdesit për të moshuar drejtojnë dhe koordinojnë shërbimet e ofruara nga qendrat rezidenciale për trajtimin e të moshuarve.

Në këto qendra ofrohen shërbime ndaj individëve për shkak të kushteve të pavarura prej tyre, siç mund të jetë mosha e thyer, mospasja e familjes, mospasja e një strehe apo çdo shkak tjetër që e bën të pamundur që ata të kujdesen për veten.

Detyrat kryesore

• Sigurojnë drejtimin e përgjithshëm të institucionit, qendrës apo organizatës që merret me ofrimin e shërbimeve ndaj të moshuarve;
• Zhvillojnë dhe monitorojnë programe të cilat kanë për qëllim rritjen e cilësisë së shërbimit ndaj të moshuarve;
• Hyjnë në marrëdhënie me institucione të tjera shtetërore, si dhe me subjekte private për të mundësuar sigurimin e financimeve dhe donacioneve të ndryshme;
• Administrojnë fondet dhe sigurohen për përdorimin me eficiencë të tyre;
• Drejtojnë procesin e rekrutimit, përzgjedhjes dhe trajnimit të personelit;
• Drejtojnë procese të tilla si, planifikimi i buxhetit, hartimi i raporteve në lidhje me veprimtarinë e institucionit, kryerjen e shpenzimeve dhe arritjen e objektivave;
• Përcaktojnë objektivat, nxjerrin urdhra dhe vendosin rregulla në institucionin që drejtojnë;
• Organizojnë trajnime për punonjësit me qëllim për të rritur aftësitë e tyre profesionale;
• Mbikëqyrin zbatimin e rregullave të higjienës, sigurisë në punë dhe të mbrojtjes së mjedisit.

Kërkesat

• Të kenë përfunduar studimet universitare dhe të jenë të pajisur me një diplomë tëstudimeve “master shkencor” ose “master i arteve”, apo të barasvlershme me to, sipaskuadrit ligjor të arsimit të lartë;
• Drejtori duhet të ketë të paktën 2 vjet përvojë pune në fushën e përkujdesjes shoqërore.
• Të mos jetë dënuar penalisht dhe të mos jetë në proces administrativ/gjyqësor për shkelje administrative/financiare;
• Të jenë të aftë mendërisht dhe fizikisht.

Informacion shtesë

Drejtuesit e shërbimeve për të moshuarit kanë një rol të rëndësishëm në mbështetjen e një grupi social pa përkrahje, siç janë të moshuarit, si dhe rritjen e besimit për jetë me dinjitet dhe pa shqetësime madhore për këtë kategori sociale.

Shkollimi i drejtuesve që ofrojnë këto shërbime preferohet të jetë në degët punë sociale/ psikologji/ sociologji/ mësuesi/infermieri.