1324Drejtues të furnizimit dhe shpërndarjes

Përshkrimi

Drejtuesit në furnizim e shpërndarje drejtojnë dhe koordinojnë furnizimin, transportimin, magazinimin dhe shpërndarjen e të mirave, qoftë si drejtues i një departamenti, një kompanie dhe apo një organizate që nuk ka nivele hierarkike manaxhimi. Ata përcaktojnë strategjitë, mbikëqyrin gjithë transaksionet e lëvizjes së produkteve, duke garantuar mbërritjen te konsumatori në kohë optimale dhe në cilësinë e kërkuar.

Detyrat kryesore

• Përcaktojnë, zbatojnë dhe monitorojnë strategjitë, politikat dhe planet për blerjen, magazinimin dhe shpërndarjen e të mirave;
• Përgatitin dhe zbatojnë plane për të ruajtur nivelet e kërkuara të stokut, me kosto minimale;
• Negociojnë kontrata me furnizuesit për të plotësuar kërkesat e cilësisë, kostos dhe shpërndarjes;
• Monitorojnë dhe rishikojnë sistemet e magazinimit dhe inventarit për të plotësuar kërkesat e furnizimit dhe nivelet e stokut;
• Operojnë sistemet e regjistrimit për të ndjekur gjithë lëvizjet e të mirave dhe për të siguruar ri-porositjen dhe ri-magazinimin në kohë optimale;
• Diskutojnë me departamente të tjera dhe me konsumatorë lidhur me kërkesat për mallrat që dalin dhe eficiencën e transportit të tyre;
• Mbikëqyrin regjistrimin e transaksioneve të blerjeve, magazinimit dhe shpërndarjes;
• Krijojnë dhe menaxhojnë buxhetet, kontrollojnë shpenzimet dhe sigurojnë përdorimin eficient të burimeve;
• Krijojnë dhe drejtojnë procedura dhe operacione administrative;
• Planifikojnë dhe drejtojnë operacione të punës së përditshme;
• Mbikëqyrin përzgjedhjen, trajnimin dhe performancën e personelit;
• Zbatojnë rregullat e sigurimit teknik në punë dhe rregullat e mbrojtjes së mjedisit;
• Menaxhojnë personelin e tyre mbështetës;
• Përfaqësojnë organizatën në takime, konferenca të këtij sektori;
• Rritin aftësitë e tyre profesionale.

Kërkesat

• Preferohet arsim i lartë;
• Kurse dhe trajnime profesionale përbëjnë avantazh;
• Aftësi drejtuese.

Informacion shtesë

Një individ mund ta nisë si agjent furnizimi e shpërndarje, magazinier duke pasur arsim të mesëm. Me eksperiencë pune apo kualifikime shtesë ai mund të punësohet si drejtues në furnizim e shpërndarje. Me arsim të lartë kryesisht në shkencat ekonomike ai mund të menaxhojë organizata më të mëdha në sektorin e furnizimit dhe shpërndarjes.