1114Drejtues të pushtetit vendor (bashki, komunë)

Përshkrimi

Drejtuesit e pushtetit vendore (kryetar bashkie, qarku ose administrator i njësisë administrative) ushtrojnë kompetencat e dhëna nga ligji në një njësi territoriale të caktuar dhe për një afat të përcaktuar ligjërisht (mandate 4-vjeçare në rastin e kryetarit të bashkisë). Ata si organi ekzekutiv i pushtetit vendor përcaktojnë objektivat, propozojnë akte, nxjerrin urdhra dhe udhëzime në lidhje me arritjen e objektivave, si dhe zbatojnë dhe mbikëqyrin zbatimin e tyre në praktikë.

Ata e marrin detyrën kryesisht pas zgjedhjeve të drejtpërdrejta popullore, por në rast të administratorit të njësisë administrative ai nuk zgjidhet por emërohet.

Detyrat kryesore

• Ushtrojnë të gjitha kompetencat në kryerjen e funksioneve të organit, me përjashtim të atyre që janë kompetencë vetëm e këshillit përkatës;
• Zbatojnë aktet e këshillit;
• Marrin masa për përgatitjen e materialeve të mbledhjeve për këshillin bashkiak, në përputhje me rendin e ditës të përcaktuar nga këshilli, si dhe për probleme që kërkon vetë këshilli bashkiak;
• Bëjnë raporte në këshill për gjendjen ekonomiko-financiare të bashkisë dhe njësive administrative përbërëse, të paktën çdo 6 muaj ose më shpesh, sa herë kërkohet nga këshilli;
• Emërojnë dhe shkarkojnë punonjësit e tjerë jo-drejtues të strukturave dhe njësive në varësi të bashkisë, përveç kur parashikohet ndryshe në ligjin 152/2013 “Për Nëpunësit Civil”;
• Miratojnë strukturën organizative dhe rregulloret bazë të administratës së bashkisë dhe të njësive administrative në varësi të tij, si dhe të institucioneve buxhetore në varësi të bashkisë;
• Emërojnë dhe shkarkojnë administratorët e njësive administrative/lagjeve;
• Marrin masa për kualifikimin dhe trajnimin e personelit të administratës, të institucioneve arsimore, sociale, kulturore e sportive që janë në juridiksionin vendor;
• Përfaqësojnë institucionin brenda dhe jashtë vendit dhe nënshkruajnë marrëveshje me palë të treta në emër të institucionit;
• Kanë të drejtë të nxjerrin urdhra me karakter detyrues.

Kërkesat

• “Kandidati” duhet të ketë vendbanimin në të njëjtën njësi territoriale që ushtron kompetencat institucioni i pushtetit vendor;
• Të mos jetë i dënuar penalisht;
• Të jenë të aftë fizikisht dhe mendërisht;
• Të plotësojë formularin e vetë deklarimit në bazë të ligjit “Për dekriminalizimin e institucioneve publike, nëpërmjet ndalimit të ushtrimit, zgjedhjes apo emërimit në funksione publike të personave me rekorde kriminale”
• Të regjistrohet si kandidat pranë KQZ-së për të marrë pjesë në zgjedhje dhe të rezultojë fitues kur kjo realizohet përmes zgjedhjeve dhe jo emërimit.

Informacion shtesë

Pozicioni i drejtuesit të pushtetit vendor kufizohet nga mandate të përcaktuara në kohë,(mandatet 4-vjeçare Kryetari i Bashkisë). Duke qenë se janë poste politike nuk kërkohet zotërimi i ndonjë profesioni të caktuar ose specializimi të veçantë.